તેલુગુ દેશમ પાર્ટી દ્વારા સરકાર સામે લાવવામાં આવેલા અવિશ્વાસ પ્રસ્તાવથી શરુ થયેલું ચોમાસું સત્ર લોકસભામાં થયેલા કામની દ્રષ્ટીએ ઘણું સારું રહ્યું છે. વર્ષ 2000 પછી આ વખતે ચોમાસા સત્રમાં સૌથી વધુ કામ થયું છે. શુક્રવારે પૂર્ણ થયેલા સત્રમાં ઘર ખરીદનારા લોકોને સશક્ત કરવાવાળા સંશોધન બીલને પણ પસાર કરવામાં આવ્યું હતું. આ સંશોધન 6 જૂને લાવવામાં આવેલા અધ્યાદેશની જગ્યા લેશે.

આંકડાઓ મુતાબિક આ સત્રમાં 20 બિલ રજૂ કરવામાં આવ્યા જેમાંથી 18 પાસ થઈ ગયા છે. લોકસભામાં નિશ્ચિત કરેલા સમયમાં 10 ટકા વધુ કામ થયું છે અને રાજ્યસભામાં 66 ટકા કામ થયું છે. લોકસભામાં 50 ટકા તો રાજ્યસભામાં 48 ટકા સમય કાયદા નિર્માણના કામમાં અપાયો છે. આ વર્તમાન સરકારમાં અપાયેલો સૌથી વધુ સમય છે. પછાત લોકો માટે રાષ્ટ્રીય આયોગની રચના બંધારણીય બનાવવી અને એસસી/એસટી એક્ટ હેઠળ તાત્કાલિક ધરપકડનો કાયદો બનાવવો સત્તાધારી પાર્ટી માટે સૌથી વધુ ફાયદારુપ થઈ શકે છે.

આ સત્રમાં લગભગ 26 ટકા બિલ સંસદીય સમિતિઓને મોકલવામાં આવ્યા હતા. 15મી લોકસભામાં આ આંકડો 71 ટકા હતો. 8 કલાકની જોગવાઈની ભરપાઈ માટે લોકસભામાં 20 કલાક વધુ કાર્યવાહી ચાલી હતી. આ સરકારમાં આ સત્ર પ્રશ્નકાળ તરીકે સારું રહ્યું હતું. પ્રશ્નકાળના સમયમાં લોકસભામાં 84 ટકા તો રાજ્યસભામાં 68 ટકા કામ થયું. જેમાં 999 ખાનગી બિલ રજૂ કરવામાં આવ્યા છે.

16મી લોકસભામાં અત્યાર સુધીમાં સૌથી વધુ કાયદા અને ન્યાય મંત્રાલય અને સ્વાસ્થ્ય અને પરિવાર કલ્યાણ મંત્રાલય દ્વારા રજૂ કરવામાં આવ્યા છે. 15મી લોકસભામાં નાણાં મંત્રાલયે સૌથી વધુ બિલ રજૂ કર્યા હતા. લોકસભા સ્પીકર સુમિત્રા મહાજને કહ્યું કે, “મે ઘણી વખત ગૃહને ચલાવવા પર જોર આપ્યું, કારણ કે વિશ્વસનીયતા બનાવવા માટે જરુરી છે. આ સત્ર પાછલા સત્રો કરતા વધારે સારું રહ્યું” રાજ્યસભાના ચેરમેન અને ઉપરાષ્ટ્રપતિ વેંકૈયા નાયડુએ કહ્યું કે બજેટ સેશન કરતા આ સત્રમાં ત્રણ ગણું વધુ કામ થયું.