ગુરૂવારે સવારે યેદિયુરપ્પાએ કર્ણાટકના મુખ્યમંત્રી પદ માટેના સોગંધ તો લઈ લીધા પરંતુ રાજકિય નાટક હજી પણ ચાલી રહ્યું છે અને તે હજી પણ આગળ વધશે. ભાજપ અને યેદિયુરપ્પા સામે બહુમત મેળવવાનો પડકાર છે તો કોંગ્રેસ-જેડીએસ તરફથી નવા આરોપ સામે આવ્યા છે. કોંગ્રેસના એક સાંસદ આનંદસિંઘ ગાયબ થઈ ગયા છે તો જેડીએસ નેતા કુમારસ્વામીએ મોદી સરકાર પર ઈડી દ્વારા ધમકાવવાનો આરોપ મૂક્યો છે. બીજી તરફ રાહુલ ગાંધી અને અમિત શાહ વચ્ચે પણ ટ્વિટર યુદ્ધ શરૂ થયું છે.ગુરૂવારે યેદિયુરપ્પાએ શપથ લીધા બાદ ભાજપના નેતા અને કેન્દ્રીય મંત્રી અનંત કુમારે વિશ્વાસ વ્યક્ત કર્યો હતો કે તેમની પાર્ટી બહુમત મેળવી લેશે. સુપ્રીમ કોર્ટમાં યેદિયુરપ્પાને શપધ ગ્રહણ કરતા રોકવામાં નિષ્ફળ રહ્યા બાદ કોંગ્રેસ નેતા પોતાના સાંસદો સાથે ધરણા પર બેઠા હતા. અનંત કુમારે આ અંગે કહ્યું હતું કે જો વિરોધ કરવો જ હોય તો સોનિયા ગાંધી, રાહુલ ગાંધી અને સિદ્ધારમૈયા વિરુદ્ધ કરવો જોઈએ જેમણે કોંગ્રેસને બરબાદ કર્યું છે.ગુરૂવારે સવારે કોંગ્રેસ અધ્યક્ષ રાહુલ ગાંધીએ કર્ણાટકની રાજકિય પરિસ્થિતિને લઈને ભાજપ પર નિશાન તાક્યું હતું. રાહુલ ગાંધી ટ્વિટ કર્યું હતું કે ભાજપ જ્યારે પોકળ વિજયની ઉજવણી કરી રહ્યું હશે ત્યારે ભારત લોકશાહીના પરાજયનો શોક મનાવી રહ્યું હશે. રાહુલ ગાંધીના આ ટ્વિટ પર ભાજપના રાષ્ટ્રીય અધ્યક્ષ અમિત શાહે વળતો પ્રહાર કર્યો હતો. અમિત શાહે કહ્યું હતું કે લોકશાહીની હત્યા તો ત્યારે જ થઈ ગઈ હતી જ્યારે કોંગ્રેસે જેડીએસ સાથે મળીને તકવાદી ગઠબંધન કર્યું.અમિત શાહે રાહુલ ગાંધી પર નિશાન તાકતા કહ્યું હતું કે કોંગ્રેસના અધ્યક્ષને પોતાની પાર્ટીનો ગૌરવશાળી ઈતિહાસ યાદ નથી. રાહુલ ગાંધીની પાર્ટીની પરંપરા ડરામણી રહી છે. ઈમરજન્સી, અનુચ્છેત 356નો દુરૂપયોગ, અદાલતો, મીડિયા અને સિવિલ સોસાયટીની પ્રતિષ્ઠા ઝાંખી પાડવી તે કોંગ્રેસની પરંપરા રહી છે. ભાજપના રાષ્ટ્રીય અધ્યક્ષે કહ્યું હતું કે ભાજપને 104 બેઠકો મળી છે જ્યારે કોંગ્રેસની બેઠકો ઘટીને 78 થઈ ગઈ છે. તેમના મુખ્યમંત્રી પણ મોટા અંતરથી હાર્યા છે. જેડીએસને ફક્ત 37 બેઠકો જ મળી છે. તેના પરથી જ ખબર પડે છે કે જનમત કોની પાસે છે.કોંગ્રેસ અને જેડીએસ પોતાના સાંસદો સાથે ગુરૂવારે વિધાનસભા પહોંચ્યા હતા. કોંગ્રેસે સ્વીકાર્યું હતું કે તેમના સાંસદ આનંદ સિંઘ સાથે નથી અને કદાચ તે ભાજપના પક્ષમાં છે. આનંદ સિંઘે વિજયનગરથી ચૂંટણી જીતી છે. કોંગ્રેસના સાંસદ ગુમ થવા પર કુમારસ્વામીએ મોદી સરકાર પર પ્રહાર કર્યા હતા. કુમારસ્વામીએ કહ્યું હતું કે મોદી સરકાર કેન્દ્રીય સંસ્થાઓનો ખોટો ઉપયોગ કરી રહી છે. મને વિશ્વાસ છે કે તેઓ સાંસદોને ડરાવી રહ્યા છે. આનંદ સિંઘે જણાવ્યું છે કે તે ઈડીનો ઉપયોગ કરી રહ્યા છે અને તેમનો એક કેસ ઈડીમાં છે.