સળંગ બીજી મેચમાં સદી ફટકારીને વિરાટ કોહલીએ વર્લ્ડ કપ અગાઉ તમામ હરીફને ચેતવી દીધા છે પરંતુ શુક્રવારે અહીં રમાયેલી ત્રીજી વન-ડે ક્રિકેટ મેચમાં ઓસ્ટ્રેલિયા સામે ભારતને પરાજયનો સામનો કરવો પડ્યો હતો. ઓસ્ટ્રેલિયાએ 313 રનના પડકારજનક સ્કોર નોંધાવ્યા બાદ 32 રનથી વિજય હાંસલ કર્યો હતો. આ સાથે વર્તમાન સિરીઝ જીવંત રહી હતી જેમાં ભારત 2-1ની સરસાઈ ધરાવે છે. ચોથી વન-ડે દસમીએ મોહાલીમાં રમાશે.

ધોનીના હોમગ્રાઉન્ડ પર રમાયેલી મેચમાં ઓસ્ટ્રેલિયાએ પ્રથમ બેટિંગ કરીને 50 ઓવરમાં પાંચ વિકેટે 313 રનનો સ્કોર નોંધાવ્યો હતો જેના જવાબમાં ભારત 48.2 ઓવરમાં 281 રન કરી શક્યું હતું.

314 રનના કપરા કહી શકાય તેવા ટારગેટ સામે ભારતના બંને ઓપનર નિષ્ફળ રહ્યા હતા. શિખર ધવનનું કંગાળ ફોર્મ ચિંતાજનક છે કેમ કે શુક્રવારે તે દસ બોલ રમીને માત્ર એક રન કરી શક્યો હતો તો રોહિત શર્માની રમતમાં થોડો આત્મવિશ્વાસ જણાતો હતો પરંતુ 14 બોલમાં 14 રન ફટકાર્યા બાદ તે લેગબિફોર થયો હતો. તેણે તમામ રન બાઉન્ડ્રી શોટથી જ ફટકાર્યા હતા. અંબાતી રાયડુ પણ નિષ્ફળ રહ્યા બાદ ટીમના બે સૌથી અનુભવી બેટ્સમેન વિરાટ કોહલી અને ધોની ક્રિસ પર આવ્યા હતા. બંનેએ ત્રણ વિકેટે 27 રનથી સ્કોર 86 ધી પહોંચાડ્યો હતો. બંનેની ભાગીદારી લાંબી ન હતી પરંતુ તેનાથી ટીમની બેટિંગમાં સ્થિરતા આવી હતી.

વિરાટ કોહલી આક્રમક મૂડમાં હતો. તેણે તમામ બોલર સામે મક્કમ બેટિંગ કરી હતી. 225મી મેચ રમતાં કોહલીએ કારકિર્દીની 41મી અને કેપ્ટન તરીકે 19મી સદી નોંધાવીને સચિન તેંડુલકરની 49 સદીના આંકથી નજીક પહોંચી ગયો હતો. તેણે 85 બોલમાં સદી પૂરી કર્યા બાદ 95 બોલમાં 123 રન ફટકાર્યા હતા.

વિરાટ કોહલીની વિકેટ પડ્યા બાદ ભારતનો પડકાર લગભગ શમી ગયો હતો. વિજય શંકરે 32 રન ફટકાર્યા હતા તો રવીન્દ્ર જાડેજાએ 24 રન નોંધાવ્યા હતા પરંતુ તેમની બેટિંગ માત્ર ઔપચારિકતા હતી. કોહલીની આ સિરીઝમાં સળંગ ત્રીજી વાર આઉટ કરનારા એડમ ઝામ્પાએ દસ ઓવરમાં 70 રન આપીને ત્રણ વિકેટ લીધી હતી.

વિરાટ કોહલી આ વખતે ટોસ જીતવામાં નસીબદાર રહ્યો હતો અને તેણે પ્રવાસી ટીમને પ્રથમ બેટિંગ કરવાનું આમંત્રણ આપ્યું હતું. સિરીઝમાં પહેલી વાર ઓસ્ટ્રેલિયન ઓપનર્સે અફલાતુન બેટિંગનું પ્રદર્શન કર્યું હતું. કેપ્ટન એરોન ફિંચ અને ઉસ્માન ખ્વાજાએ ભારતના એકેય બોલરને મચક આપી ન હતી. જસપ્રિત બુમરાહને પ્રારંભમાં સફળતા મળી શકે તેમ હતી પરંતુ રિવ્યૂમાં ફિંચ નોટઆઉટ જાહેર થયો હતો.

એરોન ફિંચ અને ખ્વાજાએ 32મી ઓવર સુધી વિકેટ બચાવી રાખી હતી અને 193 રન નોંધાવી દીધા હતા. આઇપીએલને કારણે ભારતમાં રમવાનો વિશાળ અનુભવ ધરાવતો ફિંચ સદી ચૂકી ગયો હતો અને 93 રનના અંગત સ્કોરે કુલદીપ યાદવની બોલિંગમાં લેગબિફોર થયો હતો. જોકે ખ્વાજાએ કારકિર્દીની પ્રથમ સદી નોંધાવવાની તક ગુમાવી ન હતી. તેણે 113 બોલમાં 11 બાઉન્ડ્રી અને એક સિક્સર સાથે 104 રન ફટકાર્યા હતા તો ફિંચના 93 રનના સ્કોરમાં દસ બાઉન્ડ્રી ઉપરાંત ત્રણ સિક્સરનો સમાવેશ થતો હતો.

ઉસ્માન ખ્વાજા આઉટ થયા બાદ ભારતે મેચમાં પુનરાગમન કર્યું હતું અને વિકેટો હાંસલ કરવામાં સફળ રહ્યું હતું. કુલદીપ યાદવે ત્રણ વિકેટ ખેરવી હતી. જોકે ઓસ્ટ્રેલિયાને આટલી મજબૂત શરૂઆત મળી હતી જેનો લાભ બાકીના બેટ્સમેને ઉઠાવ્યો હતો. ગલેન મેક્સવેલે 47 અને માર્કસ સ્ટોઇનિસે અણનમ 31 રન ફટકાર્યા હતા.

મેક્સવેલે માત્ર 31 બોલની ઇનિંગ્સમાં ત્રણ સિક્સર અને ત્રણ બાઉન્ડ્રી ફટકારી હતી તો સ્ટોઇનિસે ચાર બાઉન્ડ્રી ફટકારી હતી. આ ઉપરાંત એલેક્સ કેરીએ 17 બોલમાં 21 રનનું યોગદાન આપ્યું હતું.

કુલદીપે ભારત માટે ત્રણ વિકેટ લીધી હતી તો મોહમ્મદ શમીને એક વિકેટ સાંપડી હતી. જોકે જસપ્રિત બુમરાહ અને વિજય શંકર મોંઘા પુરવાર થયા હતા તો કેદાર જાધવે બે ઓવરમાં 32 રન આપી દીધા હતા.