પૂર્વ ભારતીય ક્રિકેટર અને સ્ફોટક બેટ્સમેન વી બી ચંદ્રશેખરનું 57 વર્ષની ઉંમરે ચેન્નઈમાં નિધન થયું હતું. છ દિવસ બાદ તેમનો 58મો જન્મદિવસ હતો તે પહેલા જ તેમના નિધનથી દિગજ્જ ક્રિકેટર્સ અને તેમના ચાહકોમાં શોકનું મોજું ફરી વળ્યું હતું. પોલીસના મતે વી બી ચંદ્રશેખરે આત્મહત્યા કરી હોવાની આશંકા છે. ગુરુવારે ચંદ્રશેખરે તેમના ઘરે ગળે ફાંસો ખાઈ લીધો હતો અને તેમનો મૃતદેહ લટકતી હાલતમાં મળી આવ્યો હતો. પોલીસે પ્રાથમિક દૃષ્ટિએ આત્મહત્યાનો કેસ નોંધ્યો હોવાનું જણાવ્યું છે.
પૂર્વ ભારતીય ક્રિકેટર તેમના વર્તુળમાં વીબીના નામથી જાણીતા હતા. તેમના પરિવારમાં પત્ની અને બે દીકરીઓ છે. વીબી ચંદ્રશેખર સ્ફોટક બેટ્સમેન તરીકે જાણીતા હતા અને તેમણે ભારત માટે સાત વનડેમાં રમ્યા હતા. વનડેમાં સૌથી વધુ 53 રનની હાઈએસ્ટ ઈનિંગ તેઓ રમ્યા હતા. આ ઉપરાંત 81 ફર્સ્ટ ક્લાસ મેચોમાં કુલ 4,999 રન નોંધાવ્યા હતા અને 43.09ની એવરેજથી 237(નોટ આઉટ) શ્રેષ્ઠ સ્કોર હતો. ચંદ્રશેખરે 10 સદી પણ ફટકારી હતી
તમિલનાડુ વતી રણજી મેચો પણ તેઓ રમ્યા હતા અને બાદમાં તેમણે ગોવા માટે રમ્યા હતા. ચંદ્રશેખર ક્રિકેટ બાદ કોચિંગ અને કમેન્ટ્રી ક્ષેત્રે સક્રિય હતા. તેઓ લાંબા સમય સુધી તમિલનાડુ રણજી ટીમના કોચ રહ્યા હતા. 2004-2006 સુધી તેઓ રાષ્ટ્રીય પસંદીકાર પણ રહ્યા હતા. ત્રણ વર્ષ સુધી આઈપીએલમાં ચેન્નઈ સુપર કિંગ્સ (સીએસકે)ના મેનેજર પદે પણ ચંદ્રશેખર રહી ચૂક્યા છે અને ધોનીને સીએસકેમાં લાવવા માટે તેમની મહત્વની ભૂમિકા રહી હતી. ચંદ્રશેખરના નિધનથી ક્રિકેટજગત અને તેમના ચાહકો ઘેરા શોકમાં છે.