ગુજરાતભરમાં ગરમીનો પારો દિવસેને દિવસે ઉપર જઈ રહ્યો છે, ત્યારે અમદાવાદમાં આગામી બે દિવસ માટે ‘યલો એલર્ટ’ જાહેર કરવામાં આવ્યું છે. મતલબ કે, આગામી બે દિવસ સુધી તાપમાન 43 ડિગ્રીની પણ ઉપર પહોંચશે. તેમાંય રાજ્યના કેટલાક ભાગોમાં તો ગરમી 45 ડિગ્રીને પણ આંબી જાય તેવી શક્યતા છે.ગુજરાત પરથી વાતા પવનની દિશા બદલાતા છેલ્લા ઘણા સમયથી કાળઝાળ ગરમીનો અહેસાસ થઈ રહ્યો છે. ગુરુવારે અમદાવાદમાં તાપમાન 43.3 ડિગ્રીએ પહોંચતા 10 મેનો દિવસ સિઝનનો સૌથી ગરમ દિવસ બન્યો હતો. જોકે, આગામી દિવસોમાં ગરમી તેનાથી પણ વધે તેવી શક્યતા છે.ગરમીનું પ્રમાણ વધતા અમદાવાદમાં તો જાણે બપોર થતાં જ સ્વયંભૂ કર્ફ્યુ જેવો માહોલ થઈ જાય છે. ટ્રાફિકથી સતત ધમધમતા રહેતા રસ્તા પણ સૂમસામ બની જાય છે. કાઝળાઝ ગરમીને કારણે તો અમદાવાદમાં ગુરુવારે નવો જ બનેલો એક રસ્તો પણ ઓગળી ગયો હતો. શહેરના કેટલાક રસ્તા ગરમીને કારણે ઓગળી રહ્યાની ઘટના લોકોમાં અચરજ જમાવી રહી છે.અન્ય શહેરોમાં પણ આ જ હાલત છે. વડોદરામાં પણ આગામી દિવસોમાં ગરમી 42 ડિગ્રીની આસપાસ રહેશે. રાજકોટવાસીઓને પણ ગરમીથી રાહત મળવાની કોઈ શક્યતા નથી, અને શહેરમાં 43 ડિગ્રીની આસપાસ ગરમી રહેશે. સુરતમાં પણ ગરમી 39થી 40 ડિગ્રીની આસપાસ રહેશે.આગામી દિવસોમાં ભયાનક ગરમી પડવાની છે, ત્યારે કામ સિવાય બપોરે 12થી 4ના ગાળામાં ઘરની બહાર ન નીકળવાની એડવાઈઝરી પણ કોર્પોરેશન દ્વારા જાહેર કરાઈ છે. આ ઉપરાંત, જો ગરમીમાં બહાર નીકળવું જ પડે તો સતત પ્રવાહી પીવા, ખુલ્લા અને કોટનના કપડાં પહેરવા તેમજ ટોપીથી માથું ઢાંકવું પણ સલાહભર્યું છે.