ટેલિકોમ કંપની ભારતી એરટેલ રાઈટ્સ ઈશ્યુ અને બોન્ડ મારફતે 32,000 કરોડ રૂપિયા એકત્ર કરશે. કંપનીના બોર્ડની ગુરુવારે મળેલી બેઠકમાં આ અંગેની દરખાસ્તને મંજૂરી આપવામાં આવી હતી. રિલાયન્સ જિયોના આવવાથી ટેલિકોમ સેક્ટરમાં ગણિત બદલાઈ ગયું છે. તેની સામે મજબૂત હરીફાઈ માટે કંપની આ ફંડ ઊભું કરશે. ભારતી એરટેલે કહ્યું હતું કે કંપની 25,000 કરોડ રૂપિયાનો રાઈટ્સ ઈશ્યુ લાવશે અને 7000 કરોડ રૂપિયા પર્પેચ્યૂઅલ બોન્ડ મારફતે ઊભા કરશે.એક અબજ ડોલરના મૂલ્યના પર્પેચ્યૂઅલ બોન્ડ ઈશ્યુ કરાશે. કંપનીએ રાઈટ્સ ઈશ્યુમાં શેરદીઠ 220 રૂપિયાનો ભાવ નક્કી કર્યો છે. શેરધારકોને 67 શેર સામે 19 શેર રાઈટ્સ ઈશ્યુ મારફતે મળશે. વોડાફોન આઈડિયાએ પણ 25,000 કરોડ રૂપિયા રાઈટ્સ ઈશ્યુ મારફતે ઊભા કરવાની જાહેરાત કરી હતી.