ઉત્તરી કમાનના જનરલ ઓફિસર કમાન્ડિંગ-ઈન-ચીફ લેફટનન્ટ જનરલ રણબિર સિંઘે સર્જિકલ સ્ટ્રાઈક અંગે ખુલાસો કર્યો છે. તેમણે કહ્યું છે કે થોડા દિવસ અગાઉ ડીજીએમઓએ એક આરટીઆઈના જવાબમાં કહ્યું હતું કે સપ્ટેમ્બર 2016માં એક જ સર્જિકલ સ્ટ્રાઈક થઈ છે. અમે જે કહી રહ્યાં છીએ તે જ તથ્યાત્મક છે. રાજકીય પાર્ટીઓ કાંઈ પણ કહે તેને સરકાર જવાબ આપશે. હાલમાં જ ચૂંટણી પ્રચાર દરમિયાન કોંગ્રેસના નેતા રાજીવ શુક્લાએ દાવો કર્યો હતો કે યુપીએના શાસનમાં છ વખત સર્જિકલ સ્ટ્રાઈક થઈ હતી.
લેફ્ટનન્ટ જનરલે કહ્યું છે કે બાલાકોટમાં આતંકીઓ પર હવાઈ હુમલા ભારતીય વાયુસેનાની એક મોટી સિદ્ધિ હતી. જેમાં આપણાં વિમાનોએ દુશ્મનના વિસ્તારમાં ઘણે અંદર સુધી જઈને આતંકીઓના લોન્ચપેડને ધ્વસ્ત કર્યા હતા. પાકિસ્તાનીઓએ બીજા દિવસે હવાઈ કાર્યવાહી કરી હતી. જોકે તેને જડબાતોડ જવાબ આપવામાં આવ્યો હતો. આ વર્ષે આપણાં જવાનોએ 86 આતંકીઓને ઠાર કર્યા છે. લગભગ 20ની ધરપકડ કરી છે. આતંકીઓ વિરૂદ્ધ આ રીતે જ અમારું અભિયાન ચાલતું રહેશે.
બીજી મેએ કોંગ્રેસ નેતા રાજીવ શુક્લાએ ટ્વીટ કરી જણાવ્યું હતું કે UPAના શાસનકાળમાં છ વખત સર્જિકલ સ્ટ્રાઈક કરી હતી. પહેલી સર્જિકલ સ્ટ્રાઈક 19 જૂન, 2008ના રોજ આસામ રાયફલ્સે, ગોરખા રેજિમેન્ટના ભત્તલ સેક્ટર પુંછમાં કરી હતી. બીજી સ્ટ્રાઈક 30 ઓગસ્ટ અને પહેલી સપ્ટેમ્બર 2011નાં રોજ શારદા સેક્ટરમાં રાજપૂત અને કુમાયું રેજિમેન્ટે કરી હતી. ત્રીજી સ્ટ્રાઈક છ જૂન, 2013નાં રોજ સાવન પાત્રા ચેકપોસ્ટ પર થઇ હતી. ચોથી સ્ટ્રાઈક 27-28 જુલાઈ, 2013માં નાજપીર સેક્ટરમાં થઈ હતી. પાંચમી સ્ટ્રાઈક છ ઓગસ્ટ, 2013નનાં રોજ નીલમ વેલીમાં થઈ હતી. છઠ્ઠી સર્જિકલ સ્ટ્રાઈક 14 જાન્યુઆરી, 2014નાં રોજ થઈ હતી.
સર્જિકલ સ્ટ્રાઈક કરવાના કોંગ્રેસના દાવા પર મોદીએ કહ્યું હતું કોંગ્રેસના એક વરિષ્ઠ નેતાએ નિવેદન આપ્યું હતું કે અમારા સમયમાં પણ અનેક વખત સર્જિકલ સ્ટ્રાઈક થઈ હતી. આ કેવી સર્જિકલ સ્ટ્રાઈક હતી કે ન આતંકીઓને, ન તેની પર હુમલો કરનારાઓને, ન પાકિસ્તાન, ન હિંદુસ્તાનમાં કોઈને આ અંગે ખબર પડી હતી.
મોદીએ કહ્યું હતું કે કોંગ્રેસ પહેલાં કહેતી હતી કે સર્જિકલ સ્ટ્રાઈક જેવું કંઈ નથી હોતું. આવું લશ્કર રોજ કરે છે. પહેલાં તેઓએ સર્જિકલ સ્ટ્રાઈકની મજાક ઉડાવી હતી. એસી રૂમમાં બેસીને કાગળમાં સર્જિકલ સ્ટ્રાઈક કોંગ્રેસ જ કરી શકે છે. જ્યારે કાગળ અને વીડિયો ગેમમાં જ સર્જિકલ સ્ટ્રાઈક કરવાની હોય છે તો છ હોય કે ત્રણ, 20 હોય કે 25, જેને ખોટું બોલવું જ હોય તેને શું ફરક પડે.