સુપ્રીમ કોર્ટે રાફેલ કેસમાં રિવ્યૂ પિટિશન પર નવા દસ્તાવેજોના આધારે પુન: સુનાવણી કરવાનો નિર્ણય કર્યો છે. ત્રણ જજોની બેન્ચે એકમત સાથે આ નિર્ણય લીધો છે. સુપ્રીમ કોર્ટ સમક્ષ રજૂ કરાયેલા નવા દસ્તાવેજોને આધારે રિવ્યૂ પિટિશન પર સુનાવણી કરાશે. સુપ્રીમ કોર્ટ હવે રિવ્યૂ પિટિશન પર સુનાવણી માટેની તારીખ નક્કી કરશે.
રાફેલ કેસમાં સુપ્રીમ કોર્ટે એ નક્કી કરવાનું હતું કે રક્ષા મંત્રાલયના જે દસ્તાવેજો લીક થયા છે, તેના આધારે રિવ્યૂ પિટિશન પર સુનાવણી કરવામાં આવે કે નહીં. સરકારે જણાવ્યું હતું કે રિવ્યૂ પિટિશનર કરનારે દસ્તાવેજો ગેરકાયદે રીતે મેળવ્યા હતા. જો કે કેન્દ્રે રજૂ કરેલા વાંધાને સુપ્રીમ કોર્ટે આજે ફગાવી દીધા હતા. ચીફ જસ્ટિસ રંજન ગોગોઈ, જસ્ટિસ એસ કે કૌલ અને કે એમ જોસેફ હવે આ કેસમાં સુનાવણીની તારીખ જાહેર કરશે. સુપ્રીમ કોર્ટના 14 ડિસેમ્બરના પોતાના રાફેલ સોદા અંગેના ચુકાદા સામે કરાયેલી પિટિશનોની મેરિટને આધારે સુનાવણી કરશે.
કેન્દ્ર સરકારે સુપ્રીમ કોર્ટમાં લીક થયેલા દસ્તાવેજોના આધારે રિવ્યૂ પિટિશન પર સુનાવણીનો વિરોધ કર્યો હતો અને જણાવ્યું હતું કે દસ્તાવેજો પર વિશેષાધિકાર હોવાથી તે ગુપ્ત છે અને તેને લીધે રિવ્યૂ પિટિશન ફગાવી દેવી જોઈએ. જો કે સુપ્રીમ કોર્ટમાં સુનાવણી દરમિયાન જસ્ટિસ કે. એમ. જોસેફે જણાવ્યું હતું કે માહિતી અધિકારનો કાયદો 2005માં આવ્યો હતો અને તે એક ક્રાંતિકારી પગલું હતું જેથી હવે પાછળ હટી શકાય નહીં.
સરકારે દલીલમાં જણાવ્યું હતું કે જે દસ્તાવેજોને પ્રશાંત ભૂષણે રિવ્યૂ પિટિશન સાથે રજૂ કર્યા હતા તે વિશેષાધિકાર ધરાવે છે અને રાષ્ટ્રીય સુરક્ષા સાથે સંકળાયેલા ગુપ્ત દસ્તાવેજો છે અને આરટીઆઈમાં અપવાદરૂપ છે તેમજ પુરાવા અધિનિયમ અંતર્ગત ગુપ્ત દસ્તાવેજ છે. ભારતીય પુરાવા કાયદા હેઠળ ગુપ્ત દસ્તાવેજોને રજૂ નથી કરી શકાતા. અનુચ્છેદ 19(2) હેઠળ અભિવ્યક્તિના અધિકાર પર વાજબી રોકની વાત કરવામાં આવી છે.
આરટીઆઈ હેઠળ પણ દેશની સંપ્રભુતા સાથે જોડાયેલી બાબત પણ અપવાદ માનવામાં આવે છે. સરકારી ગુપ્તતા કાયદા અંતર્ગત કલમ 3 અને 5માં પણ આનો ઉલ્લેખ છે. વકીલ પ્રશાંત ભૂષણે જણાવ્યું હતું કે તમામ દસ્તેવાજો જાહેરમાં છે. જે દસ્તાવેજો પહેલાથી જ લોકોની સામે છે તેના પર કોર્ટ વિચાર ના કરે તેવી દલીલ ફાલતું છે.