રિલાયન્સ ઇન્ડસ્ટ્રીઝ ચાલુ વર્ષે વિદેશમાંથી લગભગ 1.85 બિલિયન ડોલરનું ભંડોળ એકત્ર કરવાની યોજના ધરાવે છે. કંપની લોન દ્વારા આ રકમ મેળવશે અને તે ચાલુ નાણાકીય વર્ષમાં કોઈ પણ ભારતીય કંપની દ્વારા એકત્ર કરાયેલું સૌથી વધુ ભંડોળ હશે. લગભગ ત્રણ ડઝન બેન્ક રિલાયન્સને આ લોન આપશે. જેમાં મોટા ભાગની એશિયન બેન્કો છે.
સૂત્રોના જણાવ્યા અનુસાર લોનની મુદત પાંચ વર્ષથી થોડી વધુ હશે. જાપાન, ચીન, તાઇવાનની બેન્કો સહિત ઘણા પરંપરાગત ધિરાણકારો સમગ્ર યોજનાને આખરી ઓપ આપી રહ્યા છે. પગલાથી વાકેફ એક વ્યક્તિએ જણાવ્યું હતું કે, “કંપની ભંડોળનો ઉપયોગ રિફાઇનાન્સિંગને બદલે બિઝનેસ પ્રવૃત્તિના ફન્ડિંગ માટે કરવાની યોજના ધરાવે છે.”
લોનનો વ્યાજદર અમેરિકન ડોલર સાથે લિંક્ડ ત્રણ મહિનાના LIBOR (લંડન ઇન્ટરબેન્ક ઓફર્ડ રેટ)થી 1.25-1.40 ટકા વધુ રહેશે. LIBOR હાલ 2.386 ટકાના સ્તરે છે. અન્ય એક એક્ઝિક્યુટિવે જણાવ્યું હતું કે, કદાચ પહેલી વખત એશિયન બેન્કોનું આટલું મોટું કોન્સોર્ટિયમ રિલાયન્સ માટે વિદેશી ભંડોળ મેળવવા કામ કરી રહ્યું છે.
પ્રક્રિયામાં સામેલ કેટલીક ઇન્વેસ્ટમેન્ટ બેન્કોમાં બેન્ક ઓફ ચાઇના, સુમિટોમો મિત્સુઇ બેન્કિંગ કોર્પોરેશન (SMBC), ડેવલપમેન્ટ બેન્ક ઓફ જાપાન, DBS, HSBC, જે પી મોર્ગન, બાર્કલેઝ, ફર્સ્ટ અબુ ધાબી બેન્કનો સમાવેશ થાય છે.
જે પી મોર્ગને 14 જૂનના અહેવાલમાં જણાવ્યું હતું કે, “ઊંચા વેલ્યુએશન અને કોર બિઝનેસ માટે નબળા માહોલ છતાં અમે ‘ન્યુટ્રલ’ રેટિંગ જાળવ્યું છે.
કન્ઝ્યુ બિઝનેસમાં વ્યૂહાત્મક રોકાણકારને હિસ્સાના વેચાણની શક્યતા શેરને ટેકો આપી શકે.” મીડિયાના અહેવાલો મુજબ રિલાયન્સ કોર રિફાઇનિંગ અથવા જિયોનો હિસ્સો વેચવા સક્રિય છે.
ઉલ્લેખનીય છે કે, રિલાયન્સ સાઉદી અરામ્કોને રિફાઇનિંગ અને પેટ્રોકેમિકલ બિઝનેસનો 25 ટકા હિસ્સો વેચવા સક્રિય હોવાના અહેવાલને કંપનીએ એપ્રિલમાં નકારી કાઢ્યો હતો. રિલાયન્સના લઘુમતી હિસ્સાના વેચાણમાંથી 10-15 બિલિયન ડોલર મળવાનો અંદાજ છે. જેના આધારે રિલાયન્સના રિફાઇનિંગ અને પેટ્રોકેમિકલ્સ બિઝનેસનું મૂલ્ય લગભગ 55-60 બિલિયન ડોલર થાય છે. રિલાયન્સ જિયો ઇન્ફોકોમમાં રિલાયન્સ 20,000 કરોડનું રોકાણ કરશે.