લેણદારો RCom પાસેથી 90,000 કરોડ સુધીની રકમ માંગે તેવી શક્યતા છે. સૂત્રોના જણાવ્યા અનુસાર અનિલ અંબાણીની કંપનીના ચોપડે લગભગ 46,000 કરોડના દેવાનો આંકડો હતો અને લેણદારોની ક્લેમ તેનાથી બમણો છે. આ સાથે જે કંપનીઓ પર ઇન્સોલ્વન્સીની કાર્યવાહી થઈ છે તેમાં આ આંકડો સૌથી મોટો છે.
RComની ઇન્સોલ્વન્સી પ્રક્રિયાના ભાગરૂપે વૈશ્વિક બેન્કો, સરકાર સહિતના કાર્યકારી લેણદારો, મોબાઇલ ફોન કંપનીઓ અને ટેલિકોમ ટાવર કંપનીઓ સહિત કંપનીના ધિરાણકારોએ ઇન્ટરિમ રિઝોલ્યુશન પ્રોફેશનલ (IRP) RBSA એડ્વાઇઝર્સ LLP સમક્ષ બાકી રકમ માટેની માંગણી શરૂ કરી દીધી છે. સૂત્રએ જણાવ્યું હતું કે, “ક્લેમ મૂકવાની છેલ્લી તારીખ 21 મે છે અને એક ગણતરી પ્રમાણે ક્લેમનો આંકડો 75,000-90,000 કરોડની રેન્જમાં રહેવાનો અંદાજ છે.”
ક્લેમ ઓબ્લાઇજર અને કો-ઓબ્લાઇજરના સ્વરૂપમાં હશે. એનો અર્થ એ થયો કે, RCom અને તેના બે યુનિટ્સ – રિલાયન્સ ઇન્ફ્રાટેલ અને રિલાયન્સ ટેલિકોમ તેમજ તેની સ્ટેપ-ડાઉન કંપનીઓના ઋણની પણ ગણતરી કરવામાં આવશે. એટલે ક્લેમની રકમ RComના 46,000 કરોડના ઋણ કરતાં બમણી થવાનો અંદાજ છે.
અન્ય એક સૂત્રએ જણાવ્યું હતું કે, “રાષ્ટ્રીય બેન્કો ઉપરાંત, ચીનના ધિરાણકારો, બોન્ડધારકો પણ વ્યાજ સાથે તેમનાં લેણાંની માંગણી કરશે. ઇન્સોલ્વન્સી કેસમાં ક્લેમનો આ કદાચ સૌથી મોટો આંકડો હશે. 2017માં એસ્સારની ઇન્સોલ્વન્સી પ્રક્રિયા શરૂ થઈ ત્યારે ક્લેમની રકમ 82,541 કરોડ હતી. તેને ઇન્સોલ્વન્સી એન્ડ બેન્કરપ્સી કોડ 2016 હેઠળના અત્યાર સુધીના મોટા કેસમાં ગણવામાં આવે છે.
RCom પર ગયા સપ્તાહે ફરી ઇન્સોલ્વન્સી પ્રક્રિયા શરૂ થયા પછી IRP મનીષ કનેરિયા, મિતાલી શાહ અને પ્રદીપ સેઠી અનુક્રમે RCom, રિલાયન્સ ટેલિકોમ અને રિલાયન્સ ઇન્ફ્રાટેલની બેન્કરપ્સી પ્રક્રિયા સંભાળી રહ્યા છે. એરિક્સન જેવા કાર્યકારી લેણદારોએ 2017માં નીમેલા IRPsને કોર્ટે 30 મે સુધીમાં કોર્પોરેટ ઇન્સોલ્વન્સી રિઝોલ્યુશન પ્રક્રિયા (CIRP) અંગે પ્રોગ્રેસ રિપોર્ટ સોંપવા જણાવ્યું છે. જોકે, મુખ્ય નાણાકીય ધિરાણકાર SBI હવે RBSAને બદલવા માંગે છે. સામાન્ય રીતે IRP બાકી લેણાંના ક્લેમ ચકાસી લેણદારોની સમિતિ સમક્ષ રજૂ કરે છે.
આ જ IRP મોટા ભાગના કેસમાં RPમાં ફેરવાય છે. RComના કિસ્સામાં હજુ લેણદારોની સમિતિ નિમાઈ નથી અને સત્તાવાર રીતે RP ન નિમાય ત્યાં સુધી RBSA ઓછામાં ઓછા એક મહિના સુધી પ્રક્રિયાનું સંચાલન કરશે.
એપેલટ ટ્રિબ્યુનલે RCom અને તેના બે યુનિટ્સ સામે ઇન્સોલ્વન્સી પ્રક્રિયાનો સ્ટે ઉઠાવ્યા પછી કંપની સામે બેન્કરપ્સી કોર્ટમાં પ્રક્રિયા શરૂ કરવામાં આવી હતી. લગભગ 20,000 કરોડનું ઋણ ધરાવતી એરસેલનું સંચાલન ડેલોઇટ કરી રહી છે. અગાઉ સપ્ટેમ્બર 2017માં એરિક્સને RCom સામે 1,500 કરોડ નહીં ચૂકવવા બદલ ઇન્સોલ્વન્સી માટે અરજી કરી હતી.