લોકસભાની ચૂંટણી દરમિયાન 647 પેઇડ ન્યૂઝના કેસ નોંધાયા છે. આ ઉપરાંત વિવિધ સોશિયલ મીડિયા પ્લેટફોર્મ પરથી 909 પોસ્ટ દૂર કરવામાં આવી હતી તેમ ચૂંટણી પંચે માહિતી આપી છે. ચૂંટણીના છેલ્લા તબક્કાનું મતદાન પૂર્ણ થઇ ગયું છે. સાતમા તબક્કાના મતદાન દરમિયાન કુલ 57 પેઇડ ન્યૂઝ, છઠ્ઠા તબક્કામાં એક, પાંચમા તબક્કામાં આઠ, ચોથા તબક્કામાં 135, ત્રીજા તબક્કામાં 52, બીજા તબક્કામાં 51 અને પ્રથમ તબક્કામાં 342 કેસ નોંધાયા હતા. ચૂંટણી પંચે આપેલી માહિતી મુજબ 2014ની ચૂંટણી દરમિયાન પેઇડ ન્યૂઝના 1,297 કેસ થયા હતા. ચૂંટણી પંચે પ્રથમ વખત સોશિયલ મીડિયા પર નૈતિક આચાર સંહિતા લાગુ કરી હતી અને તમામ મતદાન ક્ષેત્રોમાં નિષ્ણાતો અને નોડલ અધિકારીઓની નિમણૂંક કરવામાં આવી હતી. ફેસબુક પરથી 650 પોસ્ટ, ટ્વિટર પરથી 220, શેર ચેટ્સ પરથી 31 અને ગૂગલ પરથી પાંચ અને વોટ્સએપ પરથી ત્રણ પોસ્ટને દૂર કરાઈ હતી.