વેદાંતાના વડા અનિલ અગ્રવાલે કહ્યું હતું કે જો એંગ્લો ભારતમાં આવે અને કોલસા ક્ષેત્રે માઈનિંગ વિદેશી કંપનીઓ માટે ખુલ્લું મુકાય તો ખૂબ સારી વાત ગણાશે. તેમણે કહ્યું કે ભારતમાં ડાયમંડ, ગોલ્ડ, પ્લેટિનમ, કોપર અને આયર્ન ઓર ક્ષેત્રે જબરદસ્ત ક્ષમતા રહેલી છે. તેને કોઈ અવગણી શકે તેમ નથી. એંગ્લો અહીં આવશે અને રોકાણ કરશે તો તે સફળ થશે.
અનિલ અગ્રવાલે માર્ચ-2017માં બ્રિટિશ માઈનિંગ જાયન્ટ એંગ્લો અમેરિકનમાં 2.3 બિલિયન ડોલરનું રોકાણ કર્યું હતું અને આ તેમનું વ્યક્તિગત રોકાણ હતું. તેમનું ફેમિલી ટ્રસ્ટ વોલ્કન હોલ્ડિંગ્સે તેમાં 11 ટકા જેવો હિસ્સો ખરીદ્યો હતો. ત્યારબાદ સપ્ટેમ્બરમાં તેમણે હોલ્ડિંગ વધાર્યું હતું અને વધુ 1.5 બિલિયન ડોલરનું રોકાણ કર્યું હતું. એંગ્લોમાં સૌથી મોટું વ્યક્તિગત રોકાણ અનિલ અગ્રવાલનું છે. એંગ્લો અમેરિકન સાઉથ આફ્રિકાના જોહાનિસબર્ગમાં અને બ્રિટનના લંડનમાં તેના હેડક્વાર્ટર ધરાવે છે. વિશ્વમાં પ્લેટિનમનું 40 ટકા ઉત્પાદન આ કંપની જ કરે છે.
માઈનિંગના માંધાતા અનિલ અગ્રવાલ દક્ષિણ આફ્રિકાની એંગ્લો અમેરિકન કંપનીને ભારતમાં કોલસા, આયર્ન ઓર, કોપર અને અન્ય ખનીજોના ક્ષેત્રે માઈનિંગ માટે ભારત લાવવા માગે છે. અનિલ અગ્રવાલે તાજેતરમાં એંગ્લોમાં 22 ટકા જેવો હિસ્સો ખરીદી લીધો છે. એંગ્લો ડી બીયર્સ જેવી મજબૂત ડાયમંડ કંપનીમાં 85 ટકા હિસ્સો ધરાવે છે. હાલ સાઉથ આફ્રિકાના પ્રેસિડેન્ટ સીરિલ રામાફોસાની આગેવાનીમાં પ્રતિનિધિમંડળ ભારત આવ્યું છે જેમાં અનિલ અગ્રવાલ પણ અહીં આવ્યા છે. અગ્રવાલે કહ્યું હતું કે ‘એંગ્લો ભારતમાં છે જ કારણ કે ભારતમાં ડી બીયર્સ ડાયમંડનું વેચાણ થાય છે. પણ હું તેમને ભારત સાથે વધુ જોડવા માગું છું.
તેમણે કહ્યું કે ‘તેમને કઈ રીતે ભારતમાં વધુ સક્રિય કરી શકાય તે અંગે અમે વાતચીત કરીશું. તેમની પાસે જબરદસ્ત બ્રાન્ડિંગ અને ટેક્નોલોજી છે, પછી તે ડાયમંડ હોય, પ્લેટિનમ હોય, કોપર હોય, આયર્ન ઓર હોય કે મેંગેનીઝ અને કોલસા હોય. તેઓ એક સમયે તો ભારતમાં રોકાણ માટે આવશે જ, તે અંગે મને જરા પણ શંકા નથી.’ જોકે આ સાથે તેમણે કહ્યું હતું કે હાલના તબક્કે રોકાણની નક્કર કોઈ દરખાસ્ત નથી.
અનિલ અગ્રવાલનું પોતાનું વેદાંતા ગ્રુપ ભારતમાં ઓઈલ, ગેસ, ઝીંક, એલ્યુમિનિયમ અને કોપરનું માઈનિંગ-ઉત્પાદન કરે છે. તેઓ ખાસ કરીને કોલસા માટે એંગ્લોને ભારત લાવવા ઈચ્છુક છે. એંગ્લો મેટલર્જિકલ કોલસાની નિકાસ કરતી વિશ્વની સૌથી મોટી કંપની છે જે ઓસ્ટ્રેલિયા, કોલંબિયા, સાઉથ આફ્રિકામાં હાલ કાર્યરત છે. 63 વર્ષીય અગ્રવાલે સ્પષ્ટ કર્યું હતું કે તેઓ એંગ્લોના વર્તમાન મેનેજમેન્ટથી ખૂબ જ સંતુષ્ટ છે અને બોર્ડમાં તેઓ હસ્તક્ષેપ કરવા માગતા નથી. તેમણે કહ્યું કે ‘તેઓ સારું કામ કરી રહ્યા છે. અમે તેમની સાથે સારી એવી વાટાઘાટ કરી રહ્યા છીએ. અમે ખુશ છીએ.
અગ્રવાલની કંપની વેદાંતા સાઉથ આફ્રિકામાં સૌથી મોટી રોકાણકાર છે અને તેણે ત્યાં ઝીંકનાં ઉત્પાદનમાં 1.6 બિલિયન ડોલરનું રોકાણ કરવાનું નક્કી કર્યું છે. સાઉથ આફ્રિકામાં માઈનિંગ કલ્ચર ખાસ્સું છે. ભારતમાં તેવું નથી. અમે બન્નેને ભેગા કરવા માગીએ છીએ. ગેમ્સબર્ગ ખાતે વેદાંતા ઝીંક ઈન્ટરનેશનલે 40 કરોડ ડોલર(અંદાજે 3000 કરોડ રૂપિયા)નું રોકાણ કર્યું છે. 2011માં ત્યાં તેણે એંગ્લો અમેરિકન પાસેથી ઝીંક માઈનિંગ પ્રોજેક્ટ ખરીદ્યો હતો. હવે તે ત્યાં ગ્રીનફિલ્ડ સ્મેલ્ટર અને રિફાઈનરીનાં નિર્માણ માટે વધુ રોકાણ કરશે.