વોટ્સએપે તેના પેમેન્ટ બિઝનેસ માટે ભારતમાં ડેટા સ્ટોરેજ ફેસિલિટી સ્થાપી હોવાનું સૂત્રોનું કહેવું છે. ફેસબૂકની માલિકીના મેસેજિંગ એપ દ્વારા હવે ભારતમાં ડિજિટલ પેમેન્ટ સર્વિસનું કોમર્શિયલ લોન્ચ કરવાની તૈયારી છે. દેશના બેન્કિંગ રેગ્યુલેટર માટે આ બહુ મોટી સિદ્ધિ છે, કારણ કે તેણે કહ્યું હતું કે વૈશ્વિક પેમેન્ટ કંપનીઓએ ભારતના યુઝર્સનો ટ્રાન્ઝેક્શન ડેટા ભારતમાં જ સ્ટોર કરવો પડશે.
વોટ્સએપ આઇસીઆઇસીઆઇ બેન્કની સાથે તેના યુનિફાઇડ પેમેન્ટ્સ ઇન્ટરફેસ આધારિત સર્વિસને લાઇવ કરે તેવી શક્યતા છે. ટૂંક સમયમાં એક્સિસ બેન્ક, એચડીએફસી બેન્ક અને એસબીઆઇ સાથેની સર્વિસ પણ શરૂ કરવામાં આવશે.
સૂત્રોએ કહ્યું કે, “વોટ્સએપે ડેટા લોકલાઇઝેશન અંગે આવશ્યક કામ કર્યું છે અને ઓડિટ પ્રોસેસ તરફ આગળ વધી છે. એક વખત ઓડિટર્સ તેનો રિપોર્ટ નિયમનકારને આપી દે ત્યાર બાદ કંપની પેમેન્ટ એપ્લિકેશન લાઇવ કરી શકશે.” આરબીઆઇના નિયમ પ્રમાણે પેમેન્ટ કંપનીઓએ સૌથી પહેલાં ભારતમાં ડેટા સ્ટોરેજ ફેસિલિટી સ્થાપવી પડશે અને ત્યાર બાદ સેન્ટ્રલ બેન્કને ઓડિટ રિપોર્ટ આપવો પડશે. આ ઓડિટ ઇન્ડિયન કમ્પ્યુટર ઇમરજન્સી રિસ્પોન્સ ટીમ (સીઇઆરટી) દ્વારા નીમેલા ઓડિટર્સ દ્વારા થવો જોઈએ.
વોટ્સએપ અને ICICI બેન્કે આ વિશે ટિપ્પણી કરી ન હતી. નેશનલ પેમેન્ટ કાઉન્સિલ ઓફ ઇન્ડિયાએ પણ ટિપ્પણી કરી નથી. વોટ્સએપ પેમેન્ટ સર્વિસ એક વર્ષ અગાઉ પાઇલટ પ્રોગ્રામ તરીકે શરૂ થયો હતો. પરંતુ રેગ્યુલેટરી પ્રશ્નોના કારણે તે ગૂંચવાયો છે. મેસેજિંગ પ્લેટફોર્મ પરથી ફેલાવાતી ખોટી માહિતી અને પ્રાઇવસીના ભંગનો મુદ્દો ગંભીર છે. વોટ્સએપે ગયા વર્ષે ફેબ્રુઆરીમાં ICICI સાથે ભાગીદારીમાં પેમેન્ટ ફીચર શરૂ કરવા પ્રયાસ કર્યો હતો પરંતુ તેને બિટા સર્વિસ પૂરતો મર્યાદિત રખાયો હતો.
હવે ડેટાના લોકલાઇઝેશન અંગે મોટી ચિંતા દૂર થઈ છે તેથી પેમેન્ટ ઓફરિંગ શરૂ થઈ શકશે તેમ સૂત્રોએ કહ્યું હતું. 6 એપ્રિલ 2018ના રોજ આરબીઆઇએ એક નોટમાં જણાવ્યું હતું કે, “તમામ સિસ્ટમ પ્રોવાઇડર્સે એ સુનિશ્ચિત કરવાનું છે કે પેમેન્ટ સિસ્ટમને લગતો તમામ ડેટા ભારતીય સિસ્ટમમાં જ સંગ્રહ કરવાનો રહેશે.”
આ ઉપરાંત તેણે મંગળવારે એક સ્પષ્ટતા આપી હતી અને કહ્યું હતું કે ભારત બહાર પ્રોસેસ થતા તમામ ડોમેસ્ટિક ડેટાને 24 કલાકની અંદર ભારત લાવીને તેને લોકલ સ્તરે સ્ટોર કરવાનો રહેશે.ચાલુ વર્ષે ઓનલાઇન રિટેલ કંપની એમેઝોને પણ ડેટા લોકલાઇઝેશનની માર્ગદર્શિકાનું પાલન કર્યું હતું અને યુપીઆઇ આધારિત પેમેન્ટ સર્વિસ શરૂ કરી હતી.