દિવાન હાઉસિંગ ફાયનાન્સ કોર્પોરેશન લિમિટેડ (DHFL) ટુંકમાં જ ઇન્ટર-ક્રેડિટર કરાર હેઠળ લગભગ રૂ.80,000 કરોડની બાકી લોનના રિપેમેન્ટ માટે છ મહિનાના મોરેટોરિયમનો પ્રસ્તાવ આપે તેવી શક્યતા છે. ડેટ રિસ્ટ્રક્ચરિંગ પછી પ્રાઇવેટ ઇક્વિટી (PE) રોકાણકારો કંપનીનો 20 ટકા હિસ્સો ખરીદે તેવી શક્યતા છે.
સૂત્રોના જણાવ્યા પ્રમાણે, “મોરેટોરિયમના ગાળામાં DHFL માત્ર બોન્ડ્સ પરનું બાકી વ્યાજ જ ચૂકવશે.” માહિતીથી વાકેફ એક એક્ઝિક્યુટિવના જણાવ્યા અનુસાર કંપની મુદ્દલની ચુકવણી પર થોડા લાંબા મોરેટોરિયમની આશા રાખે છે. ઉપરાંત, તે બેન્કર્સ સાથે 3 વર્ષ સુધીની લોન રિપેમેન્ટ મુદત માટે વાટાઘાટ કરી રહી છે. 25 જૂન સુધીમાં નવો ડેટ રિસ્ટ્રક્ચરિંગ પ્લાન સુપરત કરાશે, જે 25 સપ્ટેમ્બર પહેલાં અમલી બનશે.
રિસ્ટ્રક્ચરિંગને પગલે કંપનીમાં જરૂરી તરલતા આવશે. બોન્ડધારકો DHFLમાં રૂ.45,000 કરોડનું એક્સપોઝર ધરાવે છે. જ્યારે અન્ય ધિરાણકારોએ કંપનીને વધુ રૂ.35,000 કરોડની લોન આપી છે.
બોન્ડ રોકાણકારો અને ધિરાણકારો DHFLની ડેટ મુશ્કેલીનો ટકાઉ અને નાણાકીય રીતે શક્ય હોય તેવો ઉકેલ ઇચ્છે છે. તેઓ મોટું નુકસાન (હેરકટ) વેઠવું પડે એવી કામચલાઉ વ્યવસ્થા ઇચ્છતા નથી. આદિત્ય બિરલા સનલાઇફ AMCના CEO એ બાલાસુબ્રમણિયને જણાવ્યું હતું કે, “બેન્કો ઉપરાંત, અન્ય રોકાણકારો અને ધિરાણકારોએ રોકાણનું મૂલ્ય
મેળવવા DHFLના રિઝોલ્યુશન પ્લાનમાં ભાગ લેવો જોઈએ.” સેકન્ડરી માર્કેટમાં DHFLના બોન્ડ્સની યીલ્ડ 67 ટકાએ પહોંચી છે. કેટલાંક સ્પેશિયલ સિચ્યુએશન ફંડ્સે ભારે ડિસ્કાઉન્ટ સાથે આ બોન્ડ્સ ખરીદવાની ઓફર કરી છે. જોકે, મ્યુ ફંડ્સ અને વીમા કંપનીઓ સહિતના રોકાણકારોએ ઓફર ફગાવી દીધી હોવાથી નીચા ભાવે બહુ ઓછા ટ્રેડ થયા છે. એક કંપની એક્ઝિક્યુટિવે જણાવ્યું હતું કે, “લોન એસેટ્સ સાથે જોડાયેલી છે. અમે કોઈ હેરકટ વગર લોનને 3 વર્ષ સુધી લંબાવવા વાટાઘાટ કરી રહ્યા છીએ. અમે ધિરાણ ફરી શરૂ કરવા દર મહિને રૂ.1,200 કરોડથી રૂ.1,500 કરોડના નવા ધિરાણની માંગણી કરી છે.” DHFL દર મહિને નવા ફન્ડિંગ સાથે બેન્કો માટે નવી લોન લેવાનું કામ કરશે. કંપની ટૂંક સમયમાં લેણદારોની થાપણના રૂ.4,018 કરોડ ચૂકવવાની યોજના ધરાવે છે. કંપનીએ આધાર હાઉસિંગ ફાઇનાન્સનો 9.15 ટકા હિસ્સો વેચી રૂ.205 કરોડ એકત્ર કર્યા છે. જ્યારે એવાન્સ ફાઇનાન્શિયલ સર્વિસિસનો 31 ટકા હિસ્સો વેચીને વધુ રૂ.340 કરોડનું ભંડોળ મેળવ્યું છે.DHFLએ 2018-’19ના ચોથા ક્વાર્ટરમાં રૂ.2,223 કરોડની ચોખ્ખી ખોટ કરી હતી, જે અગાઉના વર્ષના સમાન ગાળામાં રૂ.134 કરોડનો નફો હતો. કંપનીએ 2018-’19ના ચોથા ક્વાર્ટરમાં રૂ.3,280 કરોડની વધારાની જોગવાઈ કરી છે.