ભારતના પ્રવાસે ગયેલી સાઉથ આફ્રિકાની મહિલા ક્રિકેટ ટીમ સામે યજમાને ગુજરાતના સુરતમાં રમાયેલી છ ટી-20 મેચની સીરીઝમાં 3-1થી વિજય મેળવ્યો હતો. બે મેચ વરસાદના કારણે ધોવાઈ ગઈ હતી. સીરીઝની છેલ્લી મેચમાં શુક્રવારે (4 ઓક્ટોબર) સાઉથ આફ્રિકાની ટીમે ત્રણ વિકેટે 175 રનનો જંગી સ્કોર ખડકી દીધો હતો અને તેના જવાબમાં ભારતીય મહિલા ટીમ ફક્ત 70 રન કરી ઓલઆઉટ થઈ ગઈ હતી. આ રીતે, પ્રવાસી ટીમનો 105 રને જંગી વિજય થયો હતો. સાઉથ આફ્રિકાની ઓપનિંગ જોડી લિઝેલ લી અને સુન લુસે 144 રનની ભાગીદારી ફક્ત 95 બોલમાં કરી હતી.
ભારતીય ટીમની સુકાની હરમનપ્રીતની 100મી ટી-20 મેચ હતી અને આટલી મેચ રમનારી તે પહેલી ભારતીય મહિલા ક્રિકેટર બની છે, પણ આ સિદ્ધિ તેના માટે ભૂલી જવા લાયક મેચમાં નિવડી હતી, તે યાદગાર નહોતી રહી. સમગ્ર વિશ્વમાં ફક્ત 10 મહિલા ક્રિકેટર્સ જ આટલી મેચ રમી શકી છે.