BCCIના પ્રમુખ સૌરવ ગાંગુલીએ રવિવારે ધડાકો કર્યો હતો કે હાલ ચાલી રહેલી ઘરઆંગણાની સૈયદ મુસ્તાક અલી ટી-20 ટુર્નામેન્ટમાં બૂકી દ્વારા મેચ ફિક્સ કરવા માટે એક ખેલાડીનો સંપર્ક કર્યો હતો. આ મામલાની જાણ બોર્ડના એન્ટિ કરપ્શન યુનિટને થઈ છે અને તેની તપાસ કરવામાં આવશે.

મુંબઈમાં બોર્ડની એજીએમ બાદ પત્રકારો સાથે વાતચીત કરતાં સૌરવ ગાંગુલીએ કહ્યું હતું કે, સૈયદ મુસ્તાક અલી ટુર્નામેન્ટની મેચમાં પણ બૂકીઓ મેચ ફિક્સિંગ કરવાનો પ્રયાસ કરી રહ્યા છે. એક ખેલાડીનો બૂકી દ્વારા સંપર્ક કરવામાં આવ્યો હોવાનું મને કહેવામાં આવ્યું છે. મને એ ખેલાડીનું નામ યાદ નથી, પરંતુ ખેલાડીએ તેની જાણ કરી છે. સૌરવે કહ્યું હતું કે આપણા ખેલાડીઓમાં જાણકારીનો અભાવ છે કે બૂકી તેમનો સંપર્ક કરે પછી શું કરવું.

સૌરવે ઉમેર્યું હતું કે બૂકીઓ તો સંપર્ક કરશે, પરંતુ જે ખોટું થાય છે એ કંઈક એવું છે કે બૂકીઓ તેમનો સંપર્ક કરે તે પછી જે થાય છે તે ખોટું છે. તામિલનાડુ અને કર્ણાટકમાં રમાયેલી પ્રીમિયર લીગ મેચોમાં જે ફિક્સિંગના કૌભાંડ બહાર આવ્યા તે અંગે પત્રકારોએ સૌરવને સવાલો પૂછ્યા તેના જવાબમાં તેણે ઉપરોક્ત ઘટસ્ફોટ કર્યો હતો. સપ્ટેમ્બર મહિનામાં આ બંને રાજ્યોની પ્રીમિયર લીગમાં મેચ ફિક્સિંગના આરોપસર પોલીસે પૂછપરછો કરી હતી. કર્ણાટકમાં તો આંતરરાષ્ટ્રીય સ્તરનો એક બૂકી અને કેટલાક ખેલાડીઓ પણ પકડાયા છે.

ગાંગુલીએ કહ્યું હતું કે બૂકીએ કોઈ ખેલાડીનો સંપર્ક કર્યો તેવા મામલા પ્રકાશમાં આવે એટલે બોર્ડ ટુર્નામેન્ટ રદ ન કરી શકે. જોકે તેણે સ્વીકાર્યું હતું કે ફિક્સિંગનો રાક્ષસ હવે ભારતની સ્થાનિક ટુર્નામેન્ટો સુધી પહોંચી ગયો છે. તેણે કહ્યું હતું કે અમે તામિલનાડુ અને કર્ણાટકમાં ફિક્સિંગના મામલા સામે આવ્યા પછી બંને બોર્ડ સામે સખત પગલાં લીધા છે.

સૌરવે કહ્યું કે, ચેન્નાઈ, સૌરાષ્ટ્ર અને મુંબઈમાં પણ આ પ્રકારની ટુર્નામેન્ટ્સ રમાઈ છે, પરંતુ મુંબઈ અને સૌરાષ્ટ્રમાંથી આવી કોઈ ફરિયાદ આવી નથી, પરંતુ ચેન્નાઈમાંથી બે ફરિયાદો આવી છે અને અમે તેની સામે કડક હાથે કામ લઈ રહ્યા છે. સૌરવે કહ્યું હતું કે બોર્ડ તેના એન્ટિ કરપ્શન યુનિટને વધુ સુસજ્જ કરવા જઈ રહ્યું છે. આ પ્રકારની પ્રવૃત્તિ કોઈ ઇચ્છતું નથી. તેનાથી કોઈને ફાયદો થતો નથી. ક્રિકેટમાં ભ્રષ્ટાચાર પર અંકુશ મૂકતી સિસ્ટમને મજબૂત કરવામાં આવશે. જો અત્યારની સિસ્ટમ કામ નહીં લાગે તો અમારે નવી સિસ્ટમ અમલી બનાવવા માટે તૈયાર રહેવું પડશે.